Thursday, September 20, 2012

انا صلحت ماكينة الخياطة I repaired my sewing machine

النهارده قررت أن أصلح الماكينة القديمة بتاعتي بقالي يمكن 15 سنة ماشغلتهاش كان فيها مشكلتين أولا السير اتقطع و كانت بتحوش خيط والغرزة مش مضبوطة قلت أحاول أنا أصلحها قبل ما أستعين بفني الصيانة  ، فتحتها لقيت بقايا شغل عملتة من زمان جدا قعدت أفكر و أقول لنفسي معقول أنا بقالي سنين طويلة كدة بأشتغل
المهم بدأت في تنظيفها و شيل التراب و بقايا الخيوط اللي في بيت المكوك و المكوك
وضعت زيت في الاماكن التي تتحرك فيها التروس
بدأت في تركيب السير وذلك بأنني فكيت مسمار الموتور المربوط في جسم الماكينة ودخلت السير في مكانة ثم بدأت في ربط المسمار تاني مع لف الطاره علشان أتأكد انه مشدود كويس ودوست علي الدواس لغاية ما ضبطة
 بدأت في لضم الماكينة من اول و جديد علشان اتأكد ان الخيط دخل كويس في منظم الغرز بعد عدة محاولات من فك و لضم اتضبطت الغرزة اخيرا واتصلحت الماكينة ومش ها أحتاج لفني الصيانة

   


الصورة توضح الغرزة السايبة و المكلكعة و الغرزه السليمة بعد اصلاحها

منظم الغرز هو المسئول عن شكل الغرزة

بيت المكوك لازم يبقي دائما نظيف بدون تراب او بقايا خيوط

الغرزة السليمة و الغرزة المكلكعه

Wednesday, September 5, 2012

رحلة البحث عن صندل سوارية A trip to find a soiree sandale

انا مامة العروسة  :) طويلة شوية ، هاقف علي الأقل خمس ساعات علي رجلي  في الفرح محتاجة صندل فضي مريح البسه ويكون كعبه واطي لأنني طويلة و بابا العروسة مش طويل
نزلت في رحلة البحث علي صندل سوارية نزلت الزمالك عند عبدة صالح و كل المحلات اللي جنبة  مفيش كل الموجود كعبه عالي جدا كأن البنات و الستات كلهم بيلبسوا الكعب العالي بس
نزلت في يوم تاني و رحت سكاربا في المهندسين لقيت واحدة بس مفيش مقاسي و بألف جنيه فقط يا بلاش
رحت شارع شهاب برضه مفيش فقدت الأمل فكرت انني ادور علي باليرينا  فضي بس حتي دي مش مريحة لأن كعبها واطي جدا و قلت انزل تاني وسط البلد
 وأنا ماشيه في شارع فيصل لقيت في محلات كثيرة ، اخيرا لقيت مقاس و كمان كعب واطي و بمائه جنيه فقط :) الحمدلله
كان ممكن انزل هيلتون رمسيس ، سيتي ستارز ، وسط البلد بس معنديش الوقت الف كل الاماكن دي 
ودي كانت رحلتي مع الصندل السوارية


محل في شارع شهاب كله عالي جدا









محلات المهندسين مفيش امل







اخيرا لقيته يارب يبقي مريح و ما يوجعش رجلي