Sunday, July 7, 2013

انقلاب ولا مش انقلاب المهم اننا خلصنا

بيقولوا ان اللي حصل يوم 30 يونية دة انقلاب وناس تقول لا مش انقلاب بالنسبة لية مايهمنيش المهم اننا خلصنا من الاحتلال الاخواني اللي تسلل لعقول المجتمع الفقير قبل الغني وعملة غسيل مخ واكيد علي بال ما تصحي عقول الناس تاني ها ناخد وقت
كنت حاسة اني مش في بلدي في حتة تانية و باخاف اكلم مع حد لحسن اقول حاجة تتفهم غلط 
معظم الرجالة ربوا دقنهم مش فاهمة يعني اقتناع ولا راكبين الموضة
الموضة كانت  وما زالت اخوان ستايل يعني الجلباب و الدقن والاسدال والفضفاضة وطبعا النقاب
البنات ياعيني عايزيين يلبسوا ويتشيكوا ويبقوا علي الموضة فتلاقي البنت لابسه الطرحة  والبودي الكارينا الملزق علي ايديها ومن تحت السكيني وكل جسمها متفسر يبقي اية لازمة الطرحة ؟ مش عارفة؟  وساعات تلاقيها لابسة اربع طرح في عز الحر وتقعد تلبسها في ساعه قبل ما تنزل علشان تعمل شكل جديد مختلف 
اما السيدات فاستسلموا للامر الواقع و انقاضوا لموضة الاخوان من باب التقرب لله وعلشا ن يبقوا زى الناس اللي حواليهم قليل جدا اللي لابسينه عن اقتناع وملتزمين باداب الحجاب .
لكن ياتري هل تهتم المرأه بنفسها كما يجب وهي طول النهار في الشارع من الشغل للمشاوير ولا توصيل الولاد للدروس والنادي والشوبنج وغيره و ترجع بالليل تعبانة وهلكانة وتفك الطرحة وتنام يعني طول اليوم لامة شعرها كحكة يبقي امتي تلاقي وقت تبص لنفسها في المراية
مش عارفة يمكن انا غلطانة لكن انا شايفه ان المرأه المصرية تنازلت عن حقها الطبيعي في الاهتمام بنفسها كأمراه دون تبرج او ابتذال
احنا مجتمع مختلف مش زي السعودية او الخليج مجتمع فيه كل الثقافات فمن الطبيعي ان اري اختلاف ولكن ما كنت اراه شكل واحد من الناس يبقي اكيد في حاجة مش مضبوطة
احلي مقال قرأته يشرح تغغير المجتمع اللي حصل هو
Wahabism is not my culture
امنيتي ان مصر ترجع تاني زى ما كانت مصر من غير عقد وكلاكيع