Friday, November 28, 2014

Black Friday الجمعة السوداء

استفزتني عنواين المواقع الاكترونية بجملة الجمعه السوداء ، استعدوا للجمعة السوداء ، اشتروا في الجمعة السوداء.
 :قعدت ادور علي الحدث لقيت القصة كالتالي 
الجمعة السوداء المقصود بها اليوم اللي بعد عيد الشكر اللي هو بيبقي اخر خميس في نوفمبر وهو عيد مهم عند الامريكيين و غالبا 
اليوم اللي بعده بيبقي اجازة

 بدأ الاسم في ولاية فيلاديلفيا   1961 لأن يوم الجمعه دي كانت الدنيا بتبقي زحمة جدا وكل الاهالي و الفلاحين بينزلو يعملوا شوبنج بعد عيد الشكر  
 الشوارع كلها بتتقفل وبيبقي يوم سئ جدا علي اصحاب المحلات و الناس فعلشان كدة طلع الاسم وانتشر بعد كدة في معظم الولايات
 استغل التجار هذا اليوم وبدأوا يعملوا تخفيضات رهيبة لكل المنتجات وتنافسوا مين يعمل تخفيضات اكتر وتهافتت الناس علي الشراء لدرجة ان المحلات بقت تفتح الساعة ستة صباحا وبعدين أربعة لغاية ما وصلوا دلوقتي ان في محلات بتفتح الساعة    اتناشربالليل يوم 
عيد الشكر
الناس بتقف طوابير تستني المحل لما يفتح علشان تشتري اللي هي عايزاه بأسعار 
مخفضة 
ياريت نتعلم نستغل الاجازات الرهيبة اللي عندنا بهذا الشكل يمكن الدنيا تمشي
 شويه

http://www.dailymail.co.uk/news/article-2852585/Mayhem-Black-Friday-begins-Shoppers-clash-supermarkets-trying-grab-bargains-Boots-Game-Curry-s-PC-world-websites-crash-thousands-start-hunt-Christmas-deals.html



Crowds surged through the store as they battled to purchase one of the Polaroid 40inch HD TVs which is now out of stock across Asda stores


A staff member was forced to intervene as the customer fell to her knees in a desperate attempt to claim the TV, which was reduced from £219 to £139

Monday, November 10, 2014

مهرجان القاهرة السينمائي 2014

افتتح امس مهرجان القاهرة السينمائي 2014 بعد غياب عامين افتقدنا فيهم رؤية الفنانين والفنانات بكامل اناقتهم. احسست ان الحفل ممل نوعا ما ، يفتقد الحياة و الموسيقي وذلك لعدم وجود فقرات راقصة او فنية كله كلام في كلام والشاشة تعرض فقط لقطات من الافلام
بالنسبة للازياء سيطر اللون الاسود و الازرق المائل للموف علي فساتين الفنانات ، ايضا الديكولتيه الواسع و السان بروتال والكتف الواحد
هناك فساتين رائعة وهناك فساتين سيئة في رأيي ان فستان يسرا ودرة الاجمل










 فساتين سيئة
  الديكولتيه مفتوح جدا وصدر الهام شاهين علي وشك الظهور

 فستان سمية خشاب غريب اما بوسي شلبي فدوشة شوية

 صفاء جلال وفستان من قماش يبدو انه رخيص و الموديل مش ملائم لجسمها
داليا البحيري غير موفقة علي الاطلاق في لون الفستان والبنطلون اللي تحت غير مناسب مع نوع القماش و المناسبة 
  في رأيي ان فستان يسرا ودرة هما الأجمل
الصور من
  

Tuesday, October 28, 2014

منين اللبس دة

 http://www.starstyle.com/miranda-kerr-council-of-fashion-designers-of-america-and-vogue-fashion-fund-event-sp177336/

دة لينك بيجيب صور الفنانين وبيقوللك كمان اشتروا اللبس منين يعىي لو بتفكري تشتري اللبس :)

Sunday, August 17, 2014

لحظات سعادة

قررت انني اكتب الحاجات اللي بتخليني مبسوطة علشان لما ابقي زعلانة اقراها واعرف اعمل ايه علشان ابقي مبسوطة تاني
لما اقعد مع ناس بحبهم زي اهلي واصحابي
لما اقعد علي النيل
لما اكل حاجة بحبها زي السنابون او ايس كريم النوجة
لما اخلص حاجة كنت بافصلها
لما اقعد في مكان مفتوح في زرع وعيني ماتجيبش اخر المكان
لما اسافرلمكان جديد
لما اساعد محتاج
اما اسمع اغنية حلوة او موسيقي جميلة
لما أسوق العربية في شوارع القاهرة وهي فاضية واشغل الراديو بصوت عالي
لما افتح دولاب الخياطة واوضبة واتفرج علي بقايا القماش والشرائط الملونة والزراير
لما انزل شوبنج واتفرج علي المحلات من غير ما اكون عايزة اشتري حاجة
لما حد يضحكني
اكيد انا هاكمل وكل ما افتكر حاجة هاكتبها وياريت كمان تحاولوا تعملوا كدة زي

Friday, June 6, 2014

ريزورت كولكشن

ريزورت كلمة باسمعها كتير وعارفة ان معناها مكان لقضاء اجازة او مكان للاستجمام
ريزورت كولكشن  او كروز كولكشن دي مجموعة الاجازات  بين الصيف والشتاء، بيوت الازياء الراقية بتقدمها للطبقة العليا في المجتمع
 بتنزلها في الفترة اللي قبل موسم الخريف علشان الناس اللي عايزة تسافر اجازة وعايزة لبس سهل مريح يصلح للاجازة تلاقي حاجة 
 جديدة مناسبة للأجازة سواء الاجازة دي في البحر او الصحراء او الغابات

http://www.style.com/fashionshows/review

 /2015RST-SMCCARTN/


  http://www.style.com/fashionshows/complete/slideshow/2015RST-VERSACE/#5



http://www.style.com/fashionshows/review/2015RST-CHANEL/

Saturday, May 24, 2014

أشياء مهمة في شنطة ايدك

ساعات بننزل بسرعة وناخد شنطتنا من غير ما نفكر ممكن ناخد اية معانا وبعدين نكتشف اننا نسينا حاجات مهمة جدا علشان كدة في حاجات اساسية لازم تكون في الشنطة حتي لو حبيتي تغيري الشنطة ممكن تنقلي الحاجات دي فيها علي طول
مراية صغيرة للتاكد من ان المكياج مش سايح
فازلين لانه مرطب ولو حطتتيه علي اسنانك هايمنع الروج  يسيح علي اسنانك
مناديل ورق ومناديل معطرة لازالة اي اوساخ من يديك
الروج المفضل لديك
زجاجة برفان صغيرة
طبعا فلوس او كروت ائتمان
لبان او نعناع لأزالة روائح الفم وممكن دنتال فلوس
قصافة  و مبرد علشان لو ضفرك اتكسر
شاحن الموبايل
كريم واقي الشمس
 نظارة الشمس
http://www.stylecaster.com/what-to-carry-in-your-purse/http://www.net-a-porter.com/


Fendi 2Jours small color-block textured-leather toteThe Row Round-frame acetate sunglassesBurberry Make-up Lip Cover - 08 Tea RoseChantecaille Brilliant Gloss - Pretty
 

Tuesday, May 6, 2014

شوبنج في الكويت 3

النهارده رحنا  مول اسمة 360  هو عبارة عن مكان كبير علي شكل دائرة وفيها محلات ومطاعم
 المحلات معظمها  سينيه بس مش كل الماركات زي برستيج في الافينيوز  يعني تلاقي برادا ، جيفنشي، رالف لورىن ، جوتشي ، جيس دونا كاران
زوار المول من اهل البلد مش زي الافينيوز كانوا أجانب تحسي الاختلاف في طريقة اللبس كان معظم السيدات والبنات متحفظين شوية 
 ومعظمهم بالحجاب والعباية يمكن ده بحكم موقع المول بالقرب من بيوت الكويتين المول برضه كان زحمة شوية لان يوم الاثنين 
 بيبقي يوم التخفيض لتذاكر السينما
 بكدة ابقي تقريبا زرت معظم مولات الكويت سوق شرق ، الفنار ، الكوت ،الافينيوز ، مارينا
كانت رحلة جميلة قربت تنتهي رحلة لبلد المولات والصالونات بجد في كمية صالونات تجميل غير طبيعية في كل شارع يمكن في اربعة ودة طبعا بسبب حب البنات والسيدات في الكويت انهم يكونوا دائما في احلي شكل ودائما متوضبين 


دونا كاران والبساطة دائما في موديلاتها

برادا واقل قطعة ب600 دينار  :)




محل جوفاني في الفنار مول


Friday, April 25, 2014

شوبنج في الكويت 2

النهارده رحت تقريبا اكبر مول في الكويت اسمه الافينيوز وهو مقسم لمناطق كل منطقة تحمل طابع معين اكتر منطقة بهرتني هي برستيج وتضم اشهر الماركات العالمية مثل شانيل ولانفين ،برادا ، لوي فيتون وغيرهم
  الاسعار ما حاولتش اسال حتي لا اصاب بانهيار
 المطاعم اسعارها معقولة  فتلاقيها زحمة جدا وكل انواع الاكل اللي تتخيليه
منبهرة باناقة السيدات والبنات ،  الأناقة المحترمة والغير مبتذلة ما شوفتش عري او ميني جوب الا قليل وما شفتش حجاب شاكيرا 
    الشهير اللي منتشر في القاهرة شفت سيدات وبنات الاهتمام بجمالهم له الاولوية الاولي في حياتهم يمكن اللي مساعدهم وجود   
  الامكانيات مادية وعدم وجود مشاكل اجتماعية كثيرة
  لكن مش لازم علشان امكانياتنا المادية ضعيفة اننا نهمل في نفسنا ونلبس اي حاجة ، في حاجات كتيرة ممكن نجيبها بأسعار معقولة
 سواء في اللبس او الاكسسوار و ارخص حاجة ممكن تبقي عندنا النظافة 
  







Wednesday, April 23, 2014

فوائد كثيرة اخري للفازلين

 :  بمناسبة مرور اربعة عشر سنة علي اختراع الفازلين ظهرت له مع التجربة فوائد كتيرة غير انه مجرد فازلين جيل من الفوائد دي

بيعمل علي نعومة الكوعين والركب و الكعبين
لوحطتيه بالليل علي رموشك بيتقلها
بينعم الجلد اللي حول الاظافر
بيطري الشفايف الجافة
بيثبت رائحة البرفان حطيه قبل ما تحطي البرفان ورا ودنك وفوق يدك
مزيل للمكياج
 بيقفل مسام الجلد فبيقلل الحبوب في الوجه
 وممكن يستعمل مع المكياج يخلط مع الاي شادو لعمل اي شادو  كريمي و مع الروج والبلاشر
لاعطاء لمعة للجلود زي الشنط و الاحذية
لمنع الصبغة من علي وجهك لما تيجي تصبغي شعرك حطي شوية علي الجبهة وجنب ودانك
ممكن تحطية علي حواجبك علشان شكلهم يبقي مرتب
بيشيل بقع المكياج من علي الملابس ادعكي البقعة بفوطة مبلولة مع شوية فازلين م
ممكن تحطيه علي خرم ودنك لسهولة دخول الحلق 
بيشل الصمغ بتاع الرموش الصناعية
بيسهل فتح علبة المانيكير لو دهنتي شوية جوة غطاء الزجاجة
http://www.stumbleupon.com/su/178nME#

Saturday, April 19, 2014

شوبنج في الكويت 1


دلوقتي انا في بلد عربي شقيق ،  الكويت  اول مرة ازورها فكرتني بجدة نفس الشوارع الواسعة والمباني الجديدة والشوارع اللي ما فيهاش ناس
الناس تشوفيهم بس في المولات بس في جدة غير مسموح للستات او البنات انهم يطلعوا من غيرطرحة او عباية
اما في الكويت فانتي حرة تلبسي اللي انتي عايزاه

لاحظت ان كل البنات والستات كبار وصغيرين م
ش بيخرجوا الا بمكياج كامل واخر شياكة ما فيش حاجة اسمها يلبسوا اي حاجة وينزلوا حتي الاجانب اتعلموا يلبسوا شيك
لبسهم كله شكله حلو ممكن يكون معظمه غالي وجديد واكيد طبعا نظيف  :) . علي فكرة انا بكلم علي لبس الناس مش اللي في المحلات
المحلات تحفة ممكن اقعد يوم كامل وما ازهقش وماخلصش مول واحد
النهاردة رحت الافينيوز تحفة طبعا الاسعار طبعا غالية بس في محلات اسعارها معقولة زي
سترادافاريوس ، سنتربوينت ، فورافرتوينتي وان ، ايكونيك ، بي اتش اس وغيرهم
      انا طبعا مستنية السيل علشان اقدر اخد راحتي
كل ماروح حتة جديدة هاقولكم

فاترينة فيكتوريا سيكريت  تحفة اخر دلع





Tuesday, March 25, 2014

عم ....... مش عارفة اسمة ايه

نزلت سوق سليمان جوهر،  انا حافظاه صم لأنني كنت من سكان الدقي كنت عايزة اشتري شوية حاجات 
بدأته من الأول سوق الذهب وبعدين الفضة وبعدين الخضار علي فكرة شكلة تحفة كنت عايزه اصورة بس خفت حد يزعقلي المهم وقفت عند العقاد محل مستلزمات الخياطة الشهير،  كان لازم برضة اصورة لأنه بيشتغل في ظروف غير ادمية لو شوفتوا المحل يصعب عليكو اشتريت الحاجة وبصيت علي المحل اللي جنبه برضة محل مستلزمات خياطة بس شكله غريب جدا.

زي مانتوشايفين الصورة  ، الراجل دة موجود من زمان جدا يمكن من ساعة ما بدأت اعرف امشي وكان المحل قديم جدا وكل حاجة مقلوبة وملخبطة وكنت لما اشتري منه حاجة يقعد ساعة يدور عليها المهم جدد المحل و بيضة ، قلت ياسلام اكيد بقة ها يرتبة لما رحت النهاردة لقيتة برضة ملخبط وبيدور علي حاجة لواحدة جاية تشتري ماقدرتش اقاوم اني اصوره
مش عارفة لية مايجبش حد يساعدة دة عجوز جدا
المرة الجاية لازم اسأل علي اسمه :)




Saturday, February 15, 2014

ممكن أسيب شعري الأبيض....أبيض

أول مرة شوفت شعراية بيضة في رأسي كان عمري وقتها ستةعشر سنة وقلت اية دة شعري ابيض لية ؟ سألت مامي الله يرحمها قالت لي "أنا كمان شعري أبيض وأنا صغيرة بس مش فاكرة امتي"  وبابا كمان في ناس كتير في عيلتة شعرهم أبيض يعني الموضوع وراثي في العيلة

لفترة ماهتمتش لكن كان كل شوية أصحابي في المدرسة يقولوا لي" اييية دة شعرك أبيض يااااي كبرتي وعجزتي"  أقول لهم كبرت اية يا جماعة هو أنا مش معاكم في المدرسة
المهم بعد الزن والتعليقات السخيفة اللي مالهاش لازمة زي" انتي سايبة نفسك كدة لية" و " ايه المنظر دة " مع انهم كانوا والله شعرتين وفي نص القصة يعني مش باينين قوي قررت انني أعمل حنة    أهو قلت منها تغطي الشعرتين ومنها أعمل نيو لوك باللون الجديد

مش عايزه أحكي  لكم مأساه الحنة والعذاب علشان تحطيها و تبقي شايلة علي راسك كيلو ويقولوا لي علشان تمسك لازم تسيبيها من تمن لعشر ساعات ، يانهار اسود وكنت بأعمل كدة فعلا وعلشان أشطفها رقبتي تتخلع لغايه ما كلها تنزل من شعري ، وساعات يقولوا لي حطي عليها بن ، شاي ، كركدية حطيت كل حاجة واللة والنتيجة في الاخر الشعراية البيضة بقت برتقالي قلت وماله تبقي شبه الهاي لايت
                  فضلت في العذاب دة سنين طويلة و ما كنتش عايزة أبدأ أصبغ لأنني عارفة انني لو بدأت أستعملها  مش هاقدر أبطلها وساعات كنت باعمل الصبغة ما كنتش بتمسك لأن الشعر شارب حنة ولا يمكن تمسك فيه الصبغة لغاية الحنة ما تنزل من الشعر مع الوقت
مع مرور السنين الشعر الأبيض زاد جدا مش عارفة دة بسبب الحنة ولا تطور طبيعي للحالة المهم عملت الحنة وحطيت عليها بن وكركدية وسبتها تخمر كتير وحطيتها وطلع اللون في الاخر بنفسجي وكان شكلة يضحك جدا وكانت الناس بدل ماتكلمني وتبص في عيني ألاقيها بتكلمني وتبص في شعري من يومها قررت انني أتحول للصبغة وأريح نفسي

الصبغة بتقعد في الشعر من ثلاث أسابيع لشهر وبعدين الجذور تبدأ تظهر وتضطري تعملي تاني وهكذا يعني لو عملتيها كل شهر يبقي بتصبغي اثناشر مرة في السنة تخيلي المأساه
المهم بدأت مرحلة الصبغة والسنين بتعدي ودلوقتي شعري نشف جدا وبقة عبارة عن  فتل رفيعة ولو لميتة ذيل حصان يبقي رفع القلم الرصاص بجد زهقت
فكرت انني ممكن اقرر أسيب شعري بلونه الطبيعي ......الابيض ، يعني هايحصل ايه هاتعود علي شكلي وبعد فترة الناس ها تتعود كمان وهاستريح من الهم ده.......
 بس القرارمش سهل محتاج شجاعة جامدة جدا لأنني دلوقتي بدأت أكبر فعلا ولما الشعر الأبيض بيبدأ يطول  شكلي بيبقي غريب  وبأحس فعلا اني كبرت ووشي تعبان وأبدأ اكتئب  وبعدين أجري أشتري الصبغة وأعملها تاني 
وكمان برضة عشان لسة الناس مش بتبطل تعليقات مع أول شعرة بيضة بتبدأ تظهر وتحسسسك انك عاملة كارثة علشان سايبة شعرك كدة مع ان في ستات وبنات أخذوا القرار بترك شعرهم علي لونة ومبسوطين
قلت اخذ رأي الناس اللي حوالية اللي قاللي لية يابنتي تعملي في نفسك كدة  واللي قالت لي انتي مجنونة واللي قالتلي و احنا مالنا باللي سابوا شعرهم
محتارة و الفكرة بتروح وتيجي مع كل مرة بأحط الصبغة وكل ما شوف واحدة شعرها كلة أبيض أهنيها في سري علي شجاعتها وأقول لنفسي نفسي أعمل زيك
  يا تري رأيكم اعمل  ايه؟


  الصور منhttp://ilona1.squidoo.com/beautiful-gray-hair