Wednesday, November 25, 2015

شيك في بيتك

في بنات وسيدات كتير بيقضوا وقت طويل في البيت سواء كانت ست بيت أو امرأة عاملة وشغلها من البيت
 طبعا أسهل حاجة اننا نقوم من النوم ونبدأ اليوم علي طول الفطار وبعدين هانتغدي ايه ونبدأ نطلب الطلبات من السوبرماركت و نحاسب الدليفري وندخل في دوامة الطبيخ وتلاقي نفسك علي بعد الظهر لسة بقميص النوم او الجلابية او البجامة
 حتي لو كنت بتشتغلي من البيت تلاقي نفسك كسلانة ومالكيش نفس تشتغلي ولو بصيت لنفسك  
في المراية اه تتخضي و تكتئبي من شعرك المنكوش او وشك الاصفر بالهالات الجميلة
اللي تحت عينيك
لا طب وليه المنظر دة ، لو عملت بس حاجات بسيطة وسريعة ممكن تتغيري شوية بشوية وتلاقي نفسيتك احسن ممن الأول
     أولا : بعد ما تدخلي الحمام علي طول ما تعمليش اي حاجة تانية :)  البسي اي حاجة سهلة مختلفة عن البجامة أو جلابيةالنوم او قميص النوم
  ممكن تريننج ، سويت بانتس وتوب جينز وتي شيرت يعني اي حاجة غير لبس النوم 
 ُثانيا : شوية ميك اب  خفيف  : كريم الترطيب وبعدين  كونسيلر للهالات دة اساسي ، كحل خفيف ، بلاشر وروج   بس
 وابدأي يا ستي يومك بنفس مفتوحة وشكل جميل ، جربي
موديلات حلوة قوي و رقيقة من  Anthropologie







يومياتي مع الشعر الابيض 1 Going gray






النهاردة قررت انني اكتب مذكراتي عن رحلتي الي التحول للشعر الابيض بدأت افكر في التحول من فترة ، تقريبا من سنة وكتبت
مقالة في البلوج اسمها ممكن اسيب شعري ابيض ...ابيض
بس كل مرة كنت مش باقدر اكمل واجري اشتري الصبغة او اخواتي وعائلتي يقولوا لي ايه الهبل دة هاتكبري نفسك وانتي شكلك صغير
حاسه ان الصبغة دي ادمان زي المخدرات كل ما مفعولها بيخلص بترجعلها تاني . المرة دي بأحاول تاني وقررت اني أشاركوا تجربتي يمكن أقدر أكمل ويمكن أفشل مش عارفة المهم أحاول
اول شعرة بيضاء طلعت كان عمري ستة عشر سنة استعملت الحنه لفترة لغاية اما بقت مش نافعة وتحولت للصبغه لحد دلوقتي
نفسي اشوف لون شعري الطبيعي بس يارب اقدر

يناير 7 2015

النهاردة صبغت شعري وقعدت اعيط بعد كدة. لقيت شعري خف جدا من قدام لدرجة ان الصبغة لونت الجلد لان خلاص مفيش شعر في الحتة دي و شكلي باين عليه العجز ووشي مرهق وتعبان قلت لنفسي والله هاتبقي اخر مرة احطها وكل يوم يعدي اقول امتي بقة اشوف الجذور علشان اتحدي نفسي وما احطش الصبغة ، الخوف مسيطر علية .... مش عارفة شكلي هايبقي اي

2015 7 فبراير

النهاردة يبقي بقالي حوالي شهر من غير صبغة الابيض بدا يظهر وطوله تقريبا 1سم، كل شوية ابص في المراية كأنني باراقبة وبشوف طلع ولا لسه
اللي ملاحظاه ان الشعر لما بيبقي مغسول مش بيبقي واضح قوي بعكس لو كان مش مغسول بيبان اكتر لسة الناس مش واخدة بالها من الجذور الحمدلله

مارس 2015

شهرين مروا الحمدللة لسة متماسكة علي موقفي وبرضة لسة ماحدش خد بالة قوي بس حماتي العزيزة مركزة معايا وسألتني هاتعملي شعرك امتي يا حبيبتي قلتلها شوية كدة انشاللة :) 
 لما باخرج بقيت استعمل الاي شادو الرمادي علشان يداري الفرق في اللون
كل ساعة بابص في المراية في حاجة جديدة طلعت .......ياتري باين قوي ؟
جالي شغل جديد ، عايزين مني ادي محاضرات في الستايلينج لموظفين شركة كبيرة قوي طب اعمل اية دلوقتي الميعاد بتاع المحاضرات الشهر اللي جاي يعني هايكون الابيض بان اكتر تفتكري اصبغة تاني؟ لا مش ممكن تاني لا

ابريل 2015

قررت استعين بالنت اشوف الستات والبنات اللي في موقفي عملوا اية عملت سيرتش لقيت جروب في الفيس بوك تحفة اسمه
اشتركت فيه ونصحوني انني اكمل و لقيت صور كتيرة وافكار جميلة من كبار وصغيرين اقتنعت تماما بموقفي انا باعمل الحاجة الصح مش هافكر في الشغل لما ابدأ هافكر اعمل اية
أول تعليق علي شعري من ابني" ماما شعرك الأبيض بدأ بيان" قلتله معلش أنا هاسيبه كدة شوية قاللي يعني ممكن تحضري فرحي و شعرك ابيض قلتله يمكن ساعتها اغير رايي. الموضوع مش سهل
قررت اعمل جروب ليه بالعربي علشان اسجل الاحداث اللي بتحصل لية واشجع كل واحدة في ظروفي تعمل زي ودة كان اول اعلان رسمي باللي انا باعملة ، التحول للابيض
دة اسم الجروب واشركت كل اللي انا اعرفهم ممكن يكون شعرهم في ابيض او شعرهم ابيض فعلا ، في منهم كانوا مشجعين الفكرة وفي كان رافضها تماما
الجروب لسة في بدايتة واتمني ان العدد يزيد علشان اقدر افيد ناس اكتر
باغسل شعري وقت مانا عايزة ودة في حد ذاته انجاز لأنني كنت باخاف اغسله كتير لحسن الصبغة تروح  :)  احساس رائع





مايو 2015


بقالي ثلاث شهور ماصبغتش ودي حاجة ماحصلتش من سبعه عشر سنة من ساعة ما كنت حامل في ابني وتوقفت عن الصبغة علشان الحمل. النهاردة كان أول اجتماع عائلي والابيض طبعا واضح جدا ، التعليقات كانت كلها سلبية زي عاملة في نفسك كدة ليه يا حبيبتي هاتكبري نفسك ليه، هاتكتئبي والذ حاجة زوجة ابي العزيزة وشوشتني في ودني وقالت لي علشان خاطري اصبغي شعرك ما تخافيش مش هاايحصله حاجة 
smile emoticon ما حاولتش اجادل لأن محدش هايحس الا اللي في نفس ظروفي. ردي كان معلش اصلي بريحه شوية ما اتضايقتش حسيت بس انني مختلفة ويعمل حاجة بتفرحني
كلموني تاني في الشغل وتحدد ميعاد المحاضرات ، انا متوترة جدا قررت انيي اروح للكوافير اعمل شعري يمكن يداري شوية
عملت شعري والكوافير قاللي شعرك وحش جدا انتي لية سايباه كدة قلتله معلش استحملني شوية وحاول تعملة بحيث انه مايبانش عملته وطلع شكلة حلو وحطيت اي شادو علي المناطق الفاتحة
رحت المحاضرة وكانت هايلة وما حدش خد بالة ولا بص اصلا كل الخوف والقلق دة كان في دماغي انا بس
قررت في المحاضرة التانية انني ماعملوش واشوف شكلة هايبقي ايه وفعلا رحت وواحدة قالتلي شعرك حلو قوي كدة احسن من المرة اللي فاتت:) الحمد للله

خلصت المحاضرات علي خير ونجحت في الامتحان الصعب

يونية 2015

اربع شهورلسة مش متعودة علي شكلي . خلاص ماينفعش اخبي حاجة لازم اواجه الموقف وا تعود علي الشكل الجديد جربت احط باندانا بس شكلها وحش لانها مبينة القورة بتاعتي قوي
بقيت ساعات ارفع ناحية بتوكة واسيب ناحية شكله معقول ، بدات اسمع تعليقات غريبة زي هو انتي هاتغيري الموديل دة امتي ، هو انتي عاملة هاي لايت
اما عن اراء العائلة فكلهم حاولوا اقناعي ان اغير رايي واراء واقتراحات بقة زي اعملي ماش ، حطي حنة ، اصبغي الجذور بس مش عارفين انني عملت كل التجارب دي طول السنين اللي فاتت وحقيقي زهقت
الاصدقاء كانوا متفهمين جدا حاسين بيه ومش حاسين ان في فرق انا هي انا بالعكس معظمهم قالولي لايق عليكيها
أحلي حاجة انني تحررت من الخوف والقلق. الخوف من الجذور اللي بتطلع كل ثلاث اسابيع ومحاولة اخفائها واحساس رائع انني باكتشف لون شعري الطبيعي اللي عمرة ما شفتة من ثلاثين سنة :) اعترف انني كنت في منتهي الغباءانني ماتمتعتش بشعري الطبيعي طول الفترة دي

يوليو 2015


رمضان و العزومات بقة والناس اللي مش بشوفهم من زمان اول لما اقابل حد جديد يبص الأول علي راسي وبعدين وشي وبعدين
يقوللي بشويش بصوت واطي هو انتي سايبة شعرك كدة لية ابتسم واقول موضة او بريحة شوية
بدأت احس ان شعري بيهرشني شوية وافتكرت مامي الله يرحمها لما كانت تقوللي اهرشيلي شوية يابنتي او تقوللي شوفي يا بنتي اللي بيهرشني في شعري دة. افتكرت كمان كلام الكوافير لما قاللي ان الشعرالأبيض بيهرش وماكنتش مصدقاه طلع كلامه صح :) وفعلا كنت باحس بالهرش بس تغلبت عليه بالغسيل المستمر
الشعرالجديد بدأ يطلع بس شكله يضحك جدا لأنة طالع من فوق زي الأيريال وبيهيش من فوق بس ، بقيت استعمل بانتين بديل الزيت
علشان يهدي الموضوع شويه

اغسطس


ستة شهور بدون صبغة احساس جميل ولكن....... بدأت لما ابص في المراية مش عارفة انا مها ولا مامي الله يرحمها بقيت شبهها جدا بس مفيش مشكلة انا بحبهم هما الاتنين
وفعلا مرة شفت واحد كان بقالي كتير ماشفتوش ولما شافني قال سبحان الله انا افتكرتك الحاجة الله يرحمها
اوحش حاجة بقة لما اغسل شعري وابص في المراية بابقي حاسة انني تعلب مسلوخ :)  بقيت ابص في المراية واج
انا حاسة انني بأتقشر زي ما تكوني بتقشري برتقالة او موزة بس الفرق انني مش عارفة ايه اللي تحت القشر
.حفيدي الحبيب قاللي مرة انتي لية شعرك ابيض قلتله ربنا خلقة كدة قاللي هو هايبقي كدة علي طول قلتله اه بص لي وسكت
 حسيت انه مش مقتنع بالفكرة

سبتمبر


سبعة شهور مروا وخلاص بدأت اتعود علي شكلي ومعظم الناس الللي بتعرفني شافتني خلاص واللي مش عارفاني بيتنحوا شوية وبعدين خلاص بيتكلموا عادي جدا
حسيت ان شعري طول وبقة في فرق جامد في الالوان اظن الوقت مناسب علشان اقصره شوية و بالمرة اشوف الكوافير هايقول ايه
تاني
رحتله وطبعا بص لي بزعل وقاللي لسة برضة مصممة قلتله استني بس لما تقصة والله هايعجبك وبعد ما قصه كان شكله حلو جدا
 والله هو حتي بقي مبسوط قلتله شفت كأنني عاملا بالقصد هايلايت دة حتي الرمادي موضة 
النهاردة في حد قاللي ان الأبيض هايبقي وحش عليكي ومش هايليق علي بشرتي ولازم تشوفي رأي الناس أيه واللي شايفينك شايفينك أزاي ، في الحقيقة قلتلها المهم انا حاسة بأيه ومدام انا مبسوطة أكيد دة هايبان علي وشي و ساعتها مش مهم بقة رأي الناس

أكتوبر


انا في الشهر الثامن او التاسع مش عارفة........ كأنني حامل :) الابيض تقريبا وصل للربع رأسي ، مش عارفة حاسة انه بيطول
بشويش أو يمكن انا اللي مستعجلة عايزاه يطول بسرعة علشان اللون يروح
هو دلوقتي شكلة حلو قوي وكل اللي بيشوفة بيفتكر انني عملاه بالقصد أختي لما شافتني من يومين قالتلي ايه دة هايل انتي عملتيه اصفر حلو عليكي والله....قلتلها لا والله هو اللي اصفر لوحدة :)قالتلي دة شكله كأنك عاملاه هاي لايت
أول تعليق اسمعه من زوجي الحبيب كنا قاعدين في الصالة والشمس كانت جاية علي ظهري لقيتة بيقول عارفه يا مها لون شعرك دلوقتي حلو قوي ........ ياه اخيرا قال حاجة طول الفترة اللي فاتت ماكنش بيعلق مش عارفة هي مش فارقة معاه ولا هو شكله وحش
اومش عايز يزعلني أو يمكن مش عاجباه الفكرة من اساسها

نوفمبر


لسة برضه بشوف مامي الله يرحمها في المراية كأنني اصبحت نسخة طبق الأصل منها بالذات عينيها
الشهر دة في رحلة ولازم استعد و احضر اللبس والحاجات اللي هاخدها الحمدللة اخر حاجة ممكن اقاق عليها هي شعري بس عايزة
افتكر اخذ كريم جوز الهند لأنه بيقولوا انه مغذي جدا للشعر الأبيض :)ا والكاب علشان الشمس
المشكلة في المرحلة دي ان لازم الشعر يبقي مغسول لأنه لما بيقعد اكترمن يومين بيبقي شكله قرف:)
عندي عزاء النهاردة ، ناس قرايبنا ما شفتهمش بقالي كتير قوي ربنا يستر
الغريبة انني دلوقت بقة يلفت انتباهي أي واحدة صبغة شعرها وبقيت أحس بالذات لو كانت كبيرة في السن أنه مش لايق عليها بالعكس مكبرها أكتر خصوصا لو كانت ألوان غامقة
الحمدلله العزاء عدي علي خير وسمعت كلمة ايييييييييه دة شكلك بقة زي مامتك خالص عشر مرات :) وكمان حد قالي دة اللوك الجديد بقة قلتله اه ياسيدي. بس أختي لسة مش مقتنعه وتقوللي شكلك اكبر مني....... علشان هي الأكبر
:في الرحلة دارت مناقشة بيني وبين واحدة وٍسألتني أسئلة مباشرة :
س . انتي لية سايبه شعرك أبيض ؟ دة مكبرك يعني اللي يشوفة من بعيد يقول كبيرة بس لما يدقق في ملامحك يلاقيكي صغيرة ليه كده........ انا صعبانه عليها قوي
ج .أنا مستريحة كدة ومبسوطة وزهقت من الصبغة
س. جوزك رأية ايه موافق يعني ؟
ج . عارفة هو قاللي اعمللي اللي انتي عايزاه
اه مادام قالك كدة يبقي مش موافق
؟؟؟؟؟؟؟؟ :) يعني ايه
يعني هو بيقول كدة بس لكن من جوة هو مش موافق
مش عارفة ارد عليها أقول ايه
واحدة تانية لقيتها بتقول "لأ لا اوعي تصبغي دة شكله حلو عليها جدا" 
صاحبتي التالتة رد: قالت ياجماعة صاحبتي مجنونة ....اللي هو أنا يعني

مارس 2016

 مش عارفة الأيام عدت بسرعة كدة ازاي فبراير اللي فات يبقي بقالي سنة بدون صبغة احساس رائع بالحرية و الانتصار لكن في نفس الوقت بتجيلي اوقات باحس ان شكلي فعلا كبر ووشي باهت خصوصا لما اصحي الصبح  باحاول اطرد الاحساس دة من جوايا بأنني احط اي لاينر وروج بيفرق فعلا موضوع تحديد العينين والحواجب
قررت كمان اقص شعري لانه بدا يطول وشكله بقي مش حلو ودي هاتبقي تاني مرة   اقصه من ساعة ما بدأت وانا عند الكوافير قاللي بصي انا هاعملك قهوة واحط لك فيها  منوم واحضر الصبغة تصحي تلاقي شعرك مصبوغ ايه رايك
ضحكت طبعا وقلتله استني بس لما تقصه وهايعجبك والله وفعلا طلع حلوجدا و عجبه بس حاساه برضة مش مقتنع
الغامق خلاص تقريبا انتهي يعني فاضل قصه كمان وخلاص
كان في معرض مهم حضرت الافتتاح كلهم افتكروا انني اجنبيه غالبا لأن مفيش واحدة مصرية تعمل كدة او يمكن قليلين قوي واللي يعرفني كانواعاجبهم قوي لون شعري الحمدلله
باستعمل زيت جوز الهند علشان يطريه شوية وشامبو موف علشان يخلي الابيض ابيض مايقلبش اصفر
تقريبا كل الناس اتعودت علي شكلي وما بقتش خايفة او مكسوفة من شكلي

ديسمبر 2016
خلاص تخلصت من كل الشعر المصبوغ في شهر سبتمبر كانت اخر قصه شعر
فترة التحول من الصبغه للون الطبيعي استغرقت 18 شهر
احساس رائع انني انتهيت من فترة التحول واصبحت اتمتع بلون شعري الطبيعي لأول مرة من 30 سنه
طول افترة اللي فاتت كنت باسمع تعليقيات ايجابيه منها:
 انه لايق عليكي قوي
كويس انك بدات دلوقت علشان لسه شكلك صغير
   ايه دة لونه حلو قوي انت عاملاه فين
نفسي اسيبه كدة بس مش قادرة
تعليقات سلبيه قليله جدا زي:
مكبرك ، مش باحب اشوفك كدة ، ايه دة بقيت شبه مامتك بالضبط كأن مامتي كانت وحشه مثلا
انت شكلك اكبر مني " اختي الكبيرة"
الكوافير مرة قاللي هايفتكروك مهمله و مش واخدة بالك من نفسك
عمري ما باحن ابدا للصبغة في الوقت الحالي علي الاقل وشايفه انه فعلا لايق علي
ساعات باحتاج انني احط مايك اب للعنيين علشان وشي مايبقاش باهت بس ايه المشكله لما احط ميك اب كل يوم احسن من الكيماويات اللي كنت باحطها لمدة 30 سنه
كمان بدات اغير في الوان لبسي بعدت تماما عن الألوان الارضيه الدافئه زي البني  زي  والبيج والزيتي وبدات اجيب الألوان الباردة زي الازرق والرمادي والموف والبينك الفاتح واهتم بالاكسسوار والسكارفات اللي الوانها مبهجة علشان تنور وشي 

الخلاصه انني باشجع كل واحدة بتفكر انها تبدا ومش هاتندم ابدا وما يهمكيش كلام الناس المهم انت تبقي مبسوطه وراضيه عن نفسك