Tuesday, May 3, 2016

عشق لا ينتهي

ساعات الواحد ممكن يعيش العمر كله وما يبقاش عارف هو بيحب ايه او عايز ايه و في لحظة يكتشف الحاجة اللي هو بيحبها و   وبيدور عليها و دة بينطبق علي اي حاجة زي الاشخاص او الاشياء او الاكل و حاجات تانية كتير
دة اللي حصل لي بالظيط.
كنت ماشية في الشارع رايحة مشوار ولقيت وانا ماشية محل انتيكات علي الناصية قلت ادخل اتفرج واكيد هالاقيه زي اي محل انتيكات دخلته لكن اول مادخلت حسيت اني في عالم تاني ، حسيت انني انتقلت لزمن تاني ريحة البيوت كانت جوة المحل ، ارواح الناس كانت حوالية .المحل اول لما بتدخليه تفتكري انه هي دي المساحة بس لكن في كل ركن بتلاقيه بيدخلك علي ركن تاني لغاية لما توصلي لقلب المحل وهو المكتب .مافيش فتفوتة في المحل مافيهاش قطعة انتيك ،  الانتيكات حواليك بكمية مهولة من فوق ومن تحت وعلي الرفوف وفي السقف احساس لا يوصف بجد استمتعت جدا وكنت مش عايزة امشي 
 صاحب المحل رجل فاضل و عاشق للانتيكات وضح لي انه ما كانش بيقدر يقاوم انه يشتري اي حاجة قديمة لغاية لما بقة المحل بالشكل دة غير المخازن اللي عندة
 لفتت نظري غزاله مورانو صغيرة شكلها يجنن وكمان رجلها مكسورة انا حبيتها علشان كدة،حسيت انها محتاجة بيت ومكانجديد تقعد في كأنها كائن حي و دة اللي حسيته





Sunday, March 20, 2016

قواعد مهمة في الأيتيكيت

حاجات صغيرة بتفوت علينا ممكن تغير نظرة الناس لينا وتفهمنا غلط ،  كمان بتدي انطباع وحش في حين ان بسهولة قوي ممكن تكسب الناس اللي حواليك وتخليهم يحبوك ويحترموك أكتر
العادات دي علي فكرة قديمة واكيد مامتك وجدتك كانوا بيقولوها لكن دلوقت بحكم العصر ومشغوليات كل واحدة او واحد مابقاش 
حد فاضي ينقلها لحد

قواعد مهمة في الاتيكيت 

في المطعم

الرجل لازم يتقدم المرأه ويفتح لها الباب و ياخد الجاكت او البالطو بتاعها ويوصلها للترابيزة اللي حاجزها او هايختارها

عيب جدا ان تضحكي بصوت عالي أو تبصي كتير لاي حد حواليك لأن دة في تعدي علي خصوصيات الأخرين
لو خارجة مع اصحابك وكل واحد هايدفع حسابه ركزي في الحاجات اللي بتطلبيها علشان ما تتعديش الميزانية المتاحة لك ، ونبهي علي الويتر انه يعمل شيكات منفصلة علشان ما تقعدوش تتخانقوا علي الحساب اخر الخروجة :)
لو صاحبتك اصرت تعزمك مافيش داعي تتحايلي عايها علشان ماتدفعش ، عادي خليها تعزمك وممكن بعد كدة تردي لها العزومة

علي الأكل

لو مش عارفة نظام الشوك والسكاكين ممكن تسألي اللي جنبك او الويتر عادي مفيش مشكلة
لو هاتتاخري علي الميعاد أكتر من ربع ساعة لازم تتصلي تعتذري لأنك لو ماعملتش كدة يبقي عدم احترام للناس الموجودة و منتظرة
 اقفلي موبايلك او اعمليه سايلنت لأنك خارجة مع اصحابك وعيب تسيبيهم وتقعدي تبصي في الموبايل ومش لازم الناس تعرف خططك و مشغولياتك ومشاكلك
ممنوع تعملي صوت وانتي بتاكلي وايديك لازم تبقي جنبك علشان ما تضايقيش اللي قاعد جنبك
الفوطة بتتحط علي رجلك ولما بتخلصي بتسيبيها زي ماهي مش بتطبقيها تاني
لو في بذرة زيتونة او اي حاجة عايزة تطلعيها من بقك حطي الفوطة او المنديل وطلعيها فيها و بعدين حطيها جنب الطبق
ما تغرفيش الاكل بمعلقتك او شوكتك  لأن مش صح الناس تاكل مطرحك في معلقة و شوكة في كل طبق للغرف
لو الأكل كان مشترك اعملي حساب عدد الأشخاص الموجودة وما تاكليش زيادة
لو المكان مش عاجبك مش من الذوق انك تقعدي تشتمي في المكان ممكن تقعدي شوية و تروحي

المحادثة

 الناس الراقية مابتتكلمش عن نفسها ، حياتها الخاصة ، أولادها ، انجازاتها او ماتمتلك من اموال الا لو كان في حاجة لذلك او مع اصدقائك المقربين ممكن تكلمي عن اللي حصل معاكي النهاردة الصبح أو الجو 
الاستماع   للاخر مهم جدا وعدم مقاطعته الا للضرورة وكمان تحسيسه انك مهتمة بالكلام مش سرحانة
مفيش داعي اطلاقا انك تكلمي علي حد مش موجود ، النميمة يعني
لو حكاية اتحكت قدامك مفيش داعي تقولي ياه مانا عارفاها اسمعيها وخلاص

 الزيارات

الوصول في الميعاد مهم جدا لا قبل ولا بعد الا لو ها تعتذر عن التأخير
مش لطيف انك تاخذي معاك اطفال الا لو كان هم عندهم علم مسبق بذلك 
لو في عشاء عيب جدا انك ماتكليش علشان عاملة رجيم لو فعلا عامله رجيم اعتذري عن العزومة خالص وما تقعديش تشرحي الرجيم بتاعك لأنهم ممكن يكونوا مش مهتمين انهم يعرفوا
ممكن تاكلي حاجة بسيطة وخلاص

السلام

لو داخلة مكان في ناس مفروض تسلمي علي الجميع ممكن باليد او لو ماتعرفيهمش قوي ممكن بالكلام و هز الرأس
مفروض تقومي تقفي للسيدة و لكبار السن سواء رجال أو سيدات وما تقفيش للرجال
لو في انترفيو ممكن تسلمي علي مديرك بعد انتهاء المقابلة
لو بتستلمي هدية أو تكريم لازم تسلمي باليد و تشكري مقدم الهدية

السلالم والاسانسير

الأولوية للسيدات في طلوع السلم الا لوكان مظلم او خطر ممكن الرجل يطلع معاها علشان يساعدها
بالنسبة للأسانسيرلو في رجال مع السيدات يسأل الرجل السيدات عن الادوار المطلوبة ويقوم هو بدوس الزراير
للسيدات الأولوية في الخروج من الأسانسير

المواصلات

طبعا الصغير لازم يقوم للكبير و الراجل لازم يقوم للست 
لو حد شايل حاجة تقيلة لازم نعرض المساعدة
لو حدمعاه أطفال له اولويه في الجلوس والدخول والخروج من المواصلات
الست مش مفروض تقوم للراجل حتي لو كان كبير  علشان دة واجب الرجل

المحلات 

حاولي ما تغيريش رايك كتير وانتي بتشتري لأن دة بيضايق البائع
ما ترميش الهدوم علي الأرض بعد ما تقيسي لأن البائعة مش شغالة عندك ممكن توضبيهم علي الشماعة أوترجعيهم
لما توصلي للكاشيير حضري فلوسك او الكارت علشان متأخريش اللي وراك

Monday, March 7, 2016

برنامج يوم جديد مع مصممة الأزياء مها سليمان - إعداد / إيمان زكى




لقاء تلفزيوني في قناة النيل الثقافية وكلام عن أهمية المظهر في الثقة النفس ونصائح عن طريقة اللبس والوان صيف 2016

Saturday, February 6, 2016

لوليتا فاشون

لما شفت الصور لأول مرة لفتت انتباهي جدا لأن الديزاين قديم  فيكتوري  زي فيلم ذهب مع الريح و الأفلام التاريخية اللي بتحكي أحداث القرن الثامن عشر والتاسع عشر لكن الفساتين معمولة بطريقة عصريه يعني في منها قصير او طويل قررت انني ادخل ابحث عن اصل لوليتا فاشون 

 هي اصلا ظهرت , وانتشرت في شوارع اليابان في فترة الثمانينات ومازالت موجودة للان . أما مين اللي اخترعها فهو غير معروف  علي وجه الدقة في اقوال بتقول تاثيرا بكتاب لفلاديميرنابوكوف اسمه لوليتا
 كلمه لوليتا بقت توصف شكل ، يعني البنوتة الشيك المدلعة اللي لبسها غالي وبتحب التفاصيل الصغيرة يعني الفيونكة والجوب   الكلوش الواسعة اللي بكرانيش و الشراب وبنطلون قصير تحت الجوب علشان لو الهوا طيرها مفيش حاجة تبان من تحتها ,واللبس بيتكون من تفاصيل كتيرة وطبقات كثيرة وبيبقي تقيل
لوليتا كمان بتوصف حاله يعني بتوصف البنت اللي مش بتعرف تعتمد علي نفسها وبتحتاج دايما حد يساعدها لو وقعت في اي مشكلة  
ايضا بتوصف البنت اللي عايزة تعمل حاجة غريبه تعبر بيها عن نفسها لأنها مش عارفه تلاقي حد يفهمها او يوافق علي أرائها

   لوليتا في منها ستايلز كتيرة مختلفة الكاجوال ، الكلاسيك ، الجوثيك و الكيوت وغيرهم كتير 
أعتقد ان موضة لوليتا فاشون مش منتشرة عندنا في مصرالا لو في حفلات تنكرية ممكن يستعملوا اللبس دة لكن موجودة في الخليج 
موديلات كثيرة من لوليتا في
http://www.lolitadressesshop.com/lolita-clothing-c-8.html