حياة المرأة مراحل الطفولة ، المراهقة ، الشباب ، النضوج و الشيخوخة وكل مرحلة لها افكارها و أحاسيسها زمان وأنا صغيرة في فتره المراهقة وما بعدها كنت رفيعة جدا وزني كان خمسين ك و طولي مية تمانية وستين ، ماعنديش لا صدر ولا هانش وما كنش في البرا المبطن كمان و بالبس مقاس تمانية او عشرة كنت لما اقف في المرايا أتخض من شكل العظم البارز في منطقة الحوض و الظهر و الرقبة يعني كدة جسمي كله كان عبارة عن عظم وكمان طويلة . كنت باخاف اني ألبس مايوه عادي ولا يمكن أفكر اني ألبس بكيني مثلا لأن عظمة الحوض كانت ظاهرة بشكل وحش أو يمكن أنا كنت شايفة كدة مش عارفة
كنت لما أمشي في الشارع أحس ان الناس كلها بتبص علية و علي شكلي الغريب ومعظم المعاكسات كانت هو" اوصلك ازاي دة انتي عايزة سلم " او" ايه عمود النور اللي ماشي دة " و ايه دة نخلة ماشيه علي رجليها " يعني كلام من هذا النوع
اعتقادي و اقتناعي في الوقت دة اثر علي الستايل بتاعي و تقريبا هو السبب في طريقة اختياري لملابسي
بدأت البس الواسع علشان ادي لنفسي حجم اكبر واداري الرفع لأنني ماكنتش لسة بافهم قوي في الستايل و تكوين الاجسام يعني كان البنطلون واسع و التوب كمان واسع يعني كأنك معلقة الهدوم علي شماعة متحركة ما فيش اي ملامح للجسم واضحة دة ماكنش ساعتها يفرق معايا و مازال حتي وقت قريب. دائما كنت ابعد عن الألوان الصارخة و اميل للألوان الصحراوية حتي لا ألفت النظر. الجوب و الفستان نادر ماكنت ألبسهم لأنني برضه كنت مقتنعه ان رجلي شكلها مش حلو فالبنطلون هو الزي الرسمي ليه
الأن وأنا و اقترب من الخمسين وانا بأسميه سن النضوج و بعد خبرتي و دراستي في مجال الستايلينج و مع التغييرات النفسيه لهذه المرحلة من العمر بدأت اشعر بالتغيير اكتشفت ان جسمي ليس بشع لهذه الدرجة يخليني اني أحاول ان أمسح ملامحه بالملابس الواسعه وانني ممكن ألبس ملابس مضبوطة علي الجسم مش ضيقة لدرجة الفرتكة و مش واسعة و أكبر من مقاسي ، بدأت اميل للألوان الفاتحة المرحة اللي بتعطي بهجة . اكتشفت ان الناس مش بتبص علية انا و مش واخدة بالها مني أصلا و دة احساس جوايا انا بس
قررت اني ابطل اشتري اي الوان غامقة او ترابية رغم انني بأحبها جدا وأختار البلوزات اللي جنب الجسم والبنطلون المضبوط اللي علي الموضة ، لسه ماعنديش الشجاعة اني البس الفساتين و الجوبات الا في المناسبات اللي تصلح فيها ان ألبس فستان أو جوب، بأستريح أكثر في البنطلون بس نفسي البس بوت .... يمكن الشتاء اللي جاي
بدأت احاول ان احب جسمي و شكلي كما هو و بحالته الان وان احاول باللبس و الستايل ان اداري اي عيوب انا حاسه بيها علي فكرة مش انا بس اللي باحس كدة معظم البنات و الستات مش راضيين عن جسمهم و شكلهم ودة مع الاسف بيضيع وقت كبير جدا للاستمتاع بما هو موجود حاليا
اهم حاجة انك تثقي بنفسك و تصدقي انك حلوة وكل حاجة ربنا خلقها فيكي حلوة ولو حاجة مش عاجباكي ممكن تداريها باللبس ، الأكسسوار والمكياج وانك لازم تحسي انك حلوة لنفسك مش لحد تاني او للناس
البسي اللي يعجبك واللي ترتاحي فيه ، اقراي و ابحثي عن ازاي تعرفي شكل جسمك ايه و ازاي تداري عيوب جسمك ما تضيعيش احلي سنين عمرك وانتي مستخبية في حاجات مش لايقة عليكي
لو مراهقة او في سن الشباب تمتعي بالموضة والالوان و الستايلات الجريئة ولو وصلت لسن النضوج ما تخافيش من تجربة موديلات ماكنتيش بتفكري تلبسيها التغير دلوقتي مطلوب ابدأي ، جربي وما تخافيش
الستايل الجديد موديلات جنب الجسم والوان فاتحة
الستايل القديم واسع وطويل
جنيفر لورانس بفستان من ديوريعود بنا لعصر سيندريللا و الامير 
جيسيكا شاستان بفستان من ارماني اللون سيمون والموديل رقيق و رومانسي ساندرا بولوك بفستان لايلي صعب توزيع التطريز خرافي والفستان ملائم لساندرا
تشارليز ثيرون بفستان من ديور القصة ناعمة وانسيابية الفستان شيك جدا
ناعومي واتس بفستان من ارماني قصة الصدر مبتكرة وجديدة
.jpg)
