Adele style transformation ايدل و لوك جديد

ايدل فنانة بريطانية ولدت عام 1988 و أول البوم لها كان سنه2008  

أول لما شفت صورها منذ فترة لم تلفت انتباهي قلت دي واحدة فنانة مليانة شوية وخلاص لكن لما شفت صورتها علي غلاف مجلة فوج الأخير وقالت لي ابنتي ان هذه ايدل ودي خست جدا

بدأت أبحث عن صورها القديمة ووجدت فعلا تحول رهيب في شكلها في فترة زمنية تعتبر مش طويلة حوالي سنتين

بدأت ايدل بلوك اكبر من سنها تسريحات السبعينات و مكياج يعطيها شكل أكبر من سنها الحقيقي ، عمري ما كنت أتخيل ان عندها ثلاثة و عشرين سنة فقط

ايدل كانت من الأجسام الممتلئه حتي ان قال عنها مصمم الازياء كارل لاجارفيلد انها تخينة قوي بس صوتها حلو ولكنه قدم اعتذار رسمي بعدها و قال هذا رأيي من الناحية المهنية

ردت ايدل في هذا الموضوع ان جسمها يعجبها و هذا الجسم  الطبيعي لمعظم البنات

تعرضت ايدل لمرض في احبالها الصوتية وعملت عملية قررت بعدها التوقف لفترة عن الغناء بعد نجاح البومها ايدل21

استطاعت ايدل ان تخفض من وزنها بصوره كبيرة وهذا واضح في الصور

اعتقد ان اي تحول في الستايل و اللوك يبدا من الشعر ثم المكياج ثم اللبس

احلي اغنيه لأيدلhttp://www.youtube.com

 /watch?v=hLQl3WQQoQ0&ob=av2e

في الصور التاليه ايدل باللوك القديم وبعد كدة هاتلاقي صور تانية شكلها مختلف تماما

تسريحة الشعر الشينيون المرفوع و الفستان دانتيل كلاسيك يعطينا احساس بانها أكبر سنا

  

في هذه الصورة الملابس تبرز امتلاء جسمها وتسريحه الشعر تعطيها سن أكبر 

  تسريحة الشعر من السبعينات تبرز كبر وجهها وايضا بتكبر في السن

متهيألي ان القصة مش لايقه برضه علي وشها

التحول في ستايل الشعر و المكياج يعطي اختلاف كامل في الشكل و السن لاحظي الفرق تبدو ايدل اصغر عمرا بكثير من الصور السابقة

ايضا استطاعت ايدل ان تخفض وزنها بصورة كبيرة في الفترة الاخيرة وذلك يثبت المقولة "لا يوجد مستحيل 




تسريحات الشعر الوايفي بتعطي سن اصغر وتعطي مظهر طبيعي 

صور ايدل في العدد الاخير لمجلة فوج في شهر مارس 2012

لاحظي اختلاف تسريحة الشعر و المكياج اعطي اختلاف تام في اللوك

vogue

Victoria Beckham FW 2012 مجموعة فيكتوريا بيكهام لخريف 2012

تتميز ازياء فكتوريا بيكهام بالبساطه و الخطوط المستقيمة و الليدي لايك لوك او ازياء الهوانم . استطاعت فكتوريا بيكهام في السنوات القليلة من بداية عملها في مجال الازياء ان تضع لنفسها بصمة او علامه في هذا العالم الواسع  وحصلت علي جائزة احسن مصمم  ازياء بريطاني للعام الماضي واصبحت ازيائها مطلوبة من معظم المشاهير

تعيش فيكتوريا مع عائله رياضية  جدا فزوجها دايفيد بيكهام لاعب الكرة الشهير و اولادها دائما في ملاعب الكرة وهذا كما تقول فيكتوريا كان له تأثير كبير علي مجموعتها لهذا الخريف

تقول فيكتوريا عندما رأيت اولادي عائدين من التدريب بملابس الرياضة المخططة  والشرابات الطويلة قررت ان استعمل هذه الخطوط في مجموعتي القادمة فالمجموعة كلها استطيع ان اختار منها اي قطعة و البسها 

تتنوع الالوان من الزيتي ، الاخضر الجنزاري ، الازرق الزهري و الاسود 

المجموعة كلها في موقع   vogue.com 

لاحظي القصة التي تعلو اسورة الكم والشراب السميك تحت البوت

اختيار اللون  البني الكونتراست مع الزهري

 القصة المنحنية عند الوسط و الارداف تصلح للمرأة الممتلئة

لاحظي الخطوط وقصة الكم مستوحاة من التيشيرت الرياضي والياقة ايضا

ٍShopping advise نصائح للشوبنج بسهولة

                                             عايزة انزل شوبنج

كلنا طبعا أكيد بنحب ننزل شوبنج وأسهل حاجة اننا نأخذ شنطتنا وننزل ولكن يا تري لما بننزل بنعمل ايه؟

أنا ها تكلم عن تجربتي الشخصية. أنا ممكن أنزل خمس أو ست مرات  علشان أدور علي حاجة معينة وممكن ما ألاقيهاش وممكن كمان ألاقيها و أتردد وأقول لنفسي يمكن ألاقي حاجة أحلي و أسيبها وأمشي ولما أرجع تاني علشان أشتريها الاقيها اتباعت وتبقي الفقعه الكبري لية J

بس الميزة في الموضوع ده انني بأكون حفظت المحلات منزله ايه و ايه المحلات الحلوة اللي ممكن الاقي فيها الحاجات اللي انا عاوزاها.

بعض النصائح المفيدة لتسهيل عملية الشوبنج :

1-    حددي دائما انتي عايزة تشتري ايه ، بلوزة ، بنطلون ، جاكت ، طقم كامل

2-    حددي اللون و ده بعد ما ترجعي لدولابك الجميل علشان تشوفي ايه اللون اللي ناقص

3-    لو عندك طقم ناقص قطعه حاولي انك تكمليه

4-    حددي الميزانية المتاحه علشان تعرفي هاتعملي شوبنج فين بالضبط

5-    لوعندك مناسبة ابدأي شوبنج قبلها علي الأقل بأسبوعين علشان يبقي عندك وقت كافي لتحضري للفستان و اكسسواراته ولما تنزلي البسي البرا المناسب  لفستان او طقم السهرة

6-    الأفضل انك تعملي شوبنج لوحدك علشان تعرفي تركزي ولا تتأثري برأي اخر ولو مش قادرة تقرري ممكن تحجزي الحاجة و تنزلي تاني مع من تثقي في رأيه

7-    اختاري المحل او المول اللي انتي متأكدة انك ممكن تلاقي فيه الحاجه اللي انتي عايزاها لأنك لو رحتي مكان تاني ممكن تلاقي نفسك اشتريتي حاجات انتي مش محتاجلها

8-    لما تدخلي المحل أول حاجه دوري علي اللون اللي انتي عايزاه  كده بتوفري وقت، والسكشن اللي فيه الشيء المطلوب يعني مثلا لو عايزه حاجه لبعد الظهر ادخلي علي طول علي السكشن اللي فيه ملابس السهره أو لو عايزه توب دوري علي قسم البلوزات، بعد ما تلاقي الحاجه اللي انتي عايزاها ممكن تتفرجي علي باقي المحل لكن م تضيعيش وقتك قبل كده

9-    لو في تخفيضات لا تتأثري بها حتي لا تضيعي ميزانيتك في أشياء لا تحتاجها

10-                                                                                  في التخفيضات ما تشتريش حاجه انتي مش عارفه ها تلبسيها علي ايه لأن غالبا ممكن تفضل في دولابك لأنك مش لاقيه حاجه تليق عليها

11-                                                                                  لازم تقيسي اي حاجه عايزه تشتريها و تتأكدي انها مريحه اقعدي بها و وطي و ارفعي ايدك و نزليها ومش لازم اللبس يبقي ضيق قوي او واسع مفروض انه يبقي مضبوط تأكدي أيضا أن قطعه الملابس ما فيهاش أي عيوب

12-                                                                                  تأكدي أيضا أن قطعه الملابس اللي قستيها هي بنفس المقاس اللي موضوعة في الكيس لأن ساعات كثير بتحصل لخبطة في المقاسات

فساتين ماما العتيقة Mama's vintage closet

اهدتني امي الحبيبة فساتينها القديمة لأنني في رأيها الوحيدة التي استطيع المحافظة عليها. في الحقيقة لم اعرف وقتها ماذا سأفعل بهم لكني بالتأكيد ساحافظ عليهم. قررت ان اشارككم معي في المشكلة وايضا لكي تتأملوا جمال هذه الفساتين

صنعت هذه الفساتين في فترة الستينات  علي ايدي خياطين و خياطات مختلفين وكانت امي في حاجة لعدد من الفساتين التي تصلح للسهرات و حفلات الكوكتيل

تتميز هذه الفساتين بدقه الصنع  فالتشطيب الداخلي كله مصنوع باليد فلم تكن ماكينه الاوفر قد اخترعت بعد

الاقمشه كانت وارد انجلترا بعضها اعرف اسمائها و البعض الاخر لا اعرفه لكني ساحاول ان اشرح شكله

السؤال ماذا افعل بهذه الفساتين؟ 

فستان امبير من قماش الشانتونج اللامع مع شريط اسود

فستان من الاورجانز المشغول اي شايب

فستان دانتيل بحرمله علي الصدر و نازل من تحت ايفازيه

فستان ساتان مشغول بكم كيمونو ونازل ايفازيه مصنوع علي يد خياطه شهيرة في هذا الوقت اسمها انجيل

كل يوم هاي كول Turtleneck trap

أنا عارفة و متأكدة ان اسهل حاجه في الساقعة اللي احنا فيها دي انك تنزلي كل يوم بالهاي كول والجينز واي جاكت وخلاص ، لكن في الاخر هاتلاقي شكلك هو هو مش بيتغير و ممكن كمان تزهقي من نفسك

الهاي كول او الترتل نك قطعة اساسية طبعا في دولابك ، ولكن لو اديتي شوية وقت قبل ما تنزلي ممكن تعملي ستايلز كثير قوي منها وفي نفس الوقت تلاقي نفسك بتغيري من شكلك حاولي تزودي ايشارب ، عقد طويل ، جاكيت بلون جديد او شنطة لونها حلو

في افكار هنا كثيرة ممكن تلاقي حاجة تناسبك

دة الشكل العادي ولكن لاحظي انها لبست تي شيرت من تحت للتجديد

كايتي هولمز الجاكت بكم قصير اعطي شكل جميل للبلوفر الهاي كول مع الشنطه باللون الاحمر

ممكن بدل الهاي كول نجرب البلوزات بالكول بيبي شكلها بيبقي حلو برضه

استعمال الشال بكل الوانه مع اي لبس بيبقي ستايل جدا

اختيار الجاكيت المناسب له عامل كبير في اللوك برغم ان اللبس كله اسود لكن الجاكيت و الشنطة غيروا اللوك كله ولاحظي ايضا انها اقصر من البلوفر

اختيار البوت او الحذاء بلون البلوفر بيعطي شكل شيك جدا

الجاكيت لو في ديزاين جميل بيعطي لوك مختلف تماما

مكياج راس السنة New year's make up

لسه في وقت علشان تعملي لوك جديد النهارده ، جربي مكياج النجمات  و اختاري الوان تناسب لون بشرتك و الفستان اللي هاتلبسيه ولو كنتي هتتصوري فيديو لا تنسي زيادة المكياج شويه علشان المكياج ما يبقاش باهت

لمزيد من الصور تابعي

look

شيرل كلو بمكياج ناعم

ايفا لونجوريا

اوليفيا وايلد بمكياج ليلا

ميلا كونيز و مكياج سموكي ايز

بليك ليفلي و مكياج بسيط ذهبي

سكارليت جوهانسون سموكي ايز باللون الاكسيديه

اماندا سيفريد مكياج موف

استعدوا لرأس السنة New year is coming

بعيدا عن الأحداث المؤسفة التي تحدث في بلدي العزيزة ،احاول الهروب منها عن طريق تصفح العالم الخارجي و الاستعداد لحفلات رأس السنة و الفساتين الجميلة التي لا اراها حقيقة ، الا في الانترنت او في المحلات
لعدم وجود الفرصة للخروج والاحتفال والمناسبات التي يمكن  للسيدات او الفتيات ارتداء هذه الملابس  لكن ممكن ان يكون عندك مناسبة او فرح ممكن تاخذي فكرة من هذه الموديلات

فستان دانتيل قصير مبطن بالبيج 

لاحظي الحذاء الاصفر مع الاسود والبيج يعطي كونتراست رائع

ايما واطسون بفستان شيفون اسود بليسيه من الجزء الأسفل و درابيه في منطقة الصدر

راشيل زوي بفستان دانتيل رائع اسود ومطعم بشغل ابيض

تايلور سويفت بفستان دانتيل  مشغول و تل

سكارليت جوهانسون بفستان موديل الستينات

انجلينا جولي بفستان شيفون درابيه

 

الجميله كاثرين هيجل نجمة غلاف مجلة ال