أول مرة شوفت شعراية بيضة في رأسي كان عمري وقتها ستةعشر سنة وقلت اية دة شعري ابيض لية ؟ سألت مامي الله يرحمها قالت لي "أنا كمان شعري أبيض وأنا صغيرة بس مش فاكرة امتي" وبابا كمان في ناس كتير في عيلتة شعرهم أبيض يعني الموضوع وراثي في العيلة
لفترة ماهتمتش لكن كان كل شوية أصحابي في المدرسة يقولوا لي" اييية دة شعرك أبيض يااااي كبرتي وعجزتي" أقول لهم كبرت اية يا جماعة هو أنا مش معاكم في المدرسة
المهم بعد الزن والتعليقات السخيفة اللي مالهاش لازمة زي" انتي سايبة نفسك كدة لية" و " ايه المنظر دة " مع انهم كانوا والله شعرتين وفي نص القصة يعني مش باينين قوي قررت انني أعمل حنة أهو قلت منها تغطي الشعرتين ومنها أعمل نيو لوك باللون الجديد
مش عايزه أحكي لكم مأساه الحنة والعذاب علشان تحطيها و تبقي شايلة علي راسك كيلو ويقولوا لي علشان تمسك لازم تسيبيها من تمن لعشر ساعات ، يانهار اسود وكنت بأعمل كدة فعلا وعلشان أشطفها رقبتي تتخلع لغايه ما كلها تنزل من شعري ، وساعات يقولوا لي حطي عليها بن ، شاي ، كركدية حطيت كل حاجة واللة والنتيجة في الاخر الشعراية البيضة بقت برتقالي قلت وماله تبقي شبه الهاي لايت
فضلت في العذاب دة سنين طويلة و ما كنتش عايزة أبدأ أصبغ لأنني عارفة انني لو بدأت أستعملها مش هاقدر أبطلها وساعات كنت باعمل الصبغة ما كنتش بتمسك لأن الشعر شارب حنة ولا يمكن تمسك فيه الصبغة لغاية الحنة ما تنزل من الشعر مع الوقت
مع مرور السنين الشعر الأبيض زاد جدا مش عارفة دة بسبب الحنة ولا تطور طبيعي للحالة المهم عملت الحنة وحطيت عليها بن وكركدية وسبتها تخمر كتير وحطيتها وطلع اللون في الاخر بنفسجي وكان شكلة يضحك جدا وكانت الناس بدل ماتكلمني وتبص في عيني ألاقيها بتكلمني وتبص في شعري من يومها قررت انني أتحول للصبغة وأريح نفسي
الصبغة بتقعد في الشعر من ثلاث أسابيع لشهر وبعدين الجذور تبدأ تظهر وتضطري تعملي تاني وهكذا يعني لو عملتيها كل شهر يبقي بتصبغي اثناشر مرة في السنة تخيلي المأساه
المهم بدأت مرحلة الصبغة والسنين بتعدي ودلوقتي شعري نشف جدا وبقة عبارة عن فتل رفيعة ولو لميتة ذيل حصان يبقي رفع القلم الرصاص بجد زهقت
فكرت انني ممكن اقرر أسيب شعري بلونه الطبيعي ......الابيض ، يعني هايحصل ايه هاتعود علي شكلي وبعد فترة الناس ها تتعود كمان وهاستريح من الهم ده.......
بس القرارمش سهل محتاج شجاعة جامدة جدا لأنني دلوقتي بدأت أكبر فعلا ولما الشعر الأبيض بيبدأ يطول شكلي بيبقي غريب وبأحس فعلا اني كبرت ووشي تعبان وأبدأ اكتئب وبعدين أجري أشتري الصبغة وأعملها تاني
وكمان برضة عشان لسة الناس مش بتبطل تعليقات مع أول شعرة بيضة بتبدأ تظهر وتحسسسك انك عاملة كارثة علشان سايبة شعرك كدة مع ان في ستات وبنات أخذوا القرار بترك شعرهم علي لونة ومبسوطين
قلت اخذ رأي الناس اللي حوالية اللي قاللي لية يابنتي تعملي في نفسك كدة واللي قالت لي انتي مجنونة واللي قالتلي و احنا مالنا باللي سابوا شعرهم
محتارة و الفكرة بتروح وتيجي مع كل مرة بأحط الصبغة وكل ما شوف واحدة شعرها كلة أبيض أهنيها في سري علي شجاعتها وأقول لنفسي نفسي أعمل زيك
2 comments:
This a very interesting post, and of course the important thing is not to listen to people, and just do what you want to do! A beautiful woman is always beautiful, regardless of what colour her hair is, the important thing is to feel happy and healthy. If you want to leave your hair, then by all means, leave it it will look GORGEOUS!
There is a new model working with Marks and Specncer's called Yasmina Rossi (she's French-Italian), and her white hair is admired by the world media right now, here is a link to what she looks like on Google Images:
https://www.google.com/search?q=yasmina+rossi&source=lnms&tbm=isch&sa=X&ei=rn4CU_rtMery0wG6yICgBw&sqi=2&ved=0CAcQ_AUoAQ&biw=1607&bih=792#q=yasmina+rossi&tbm=isch&imgdii=_
And here is an article about her
http://www.dailymail.co.uk/femail/article-2242146/Marks-Spencer-model-Yasmina-Rossi-How-look-fabulous-50.html
If the links don's work, just search for "Yasmina Rossi" in Images, and for the article, search for, "Yasmina Rossi how to look fabulous at 50".
Bottom line is, being beautiful is doing what makes you feel beautiful, and grey or white hair can certainly be a beautiful thing :)
Thank you for your time reading my post I'm so happy you liked it . I followed your links and watched the photos she is really a beauty
your words will always be in my mind encouraging me to take this step.
Post a Comment